Miðvikudaginn 10. maí verða haldnar menntabúðir um stærðfræði í samstarfi Stærðfræðitorgsins og Flatar, samtaka stærðfræðikennara.

Nánari upplýsingar og skráning hér.

Það var áhugavert viðtal við Krist­inn Stein­ar Krist­ins­son, sér­fræðing­ hjá Nýherja, á mbl.is nýlega um s.k. blockchain tækni, sem hefur verið kölluð á íslensku raðreita­tækni eða einfaldlega keðjan. Raðreitnatæknin er undirstaða rafrænna gjaldmiðla eins og Bitcoin og dularfulli íslenski tilraunagjaldmiðillinn Auroracoin. Raðreitatæknin tryggir öryggi og rekjanleika gagna um viðskipti með rafrænum gjaldmiðlum með því að gera öll gögn um tiltekinn viðskipti aðgengileg öllum sem þurfa. Þannig er opinleiki, rekjanleiki og dulkóðun notuð til að skapa traust innan kerfisins. Engin kemst upp með að svindla ef allt er uppi á borði.

(Fyrir þá sem vilja fræðast meira um raðreitatækni er hér gagnlegur vefur Open University. Myndefni sem fylgir greininni er fengið að láni af þeim vef.)

Í hugum flestra sem til þekkja er raðreitatækni tengd viðskiptum, og þá sérstaklega viðskiptum með rafrænum gjaldmiðlum. Hins vegar er líklegt að hana mætti nýta í hvers kyns samskiptum sem byggjast á gagnafærslum og þar sem rekjanleiki og traust skipta máli. Þá má vel hugsa sér að nýta mætti tæknina í tengslum við náms- eða starfsferilsgögn, lánastarfsemi hverskonar (t.d. bókasöfn) og jafnvel prófgögn eða verkefnaskil nemenda.

Helsti kostur raðreitatækni er að hún gerir milliliði í hvers kyns aðgerðum milli tveggja eða fleiri aðila óþarfa. Til þessa hafa bankar gjarnan verið nýttir sem milliliðir í viðskiptum til að skapa traust og tryggja áreiðanleika. Ókosturinn við það er að varðveisla gagna sem tengjast viðskiptum er í höndum eins aðila. Milliliðurinn stýrir því hver hefur aðgang að gögnunum og getur nýtt sér það vald á ýmsan hátt sem er ekki endilega hagur þeirra sem skipta við hann, til dæmis með því að hækka kostnað vegna viðskipta með þjónustugjöldum og jafnvel að nýta gögnin sem söluvöru til aðila sem eru algjörlega ótengdir viðskiptunum. Þegar gögn sem þessi eru í vörlsu eins aðila er líka alltaf hætta á að gögnin skemmist eða eyðist, hvort sem er vegna viljaverka eða slysa. Raðreitatækni eyðir allri svona óvissu með því að varðveita gögn í skýinu þar sem þau eru dreifð og afrituð á fjölda netpunkta. Í vissum skilningi má því segja að gögnin eru alls staðar vegna þess að þau eru hvergi. Það er ekki hægt að takmarka aðgengi að gögnunum né að skemma eða eyða þeim vegna þess að það er engin einn miðpunktur þar sem hægt er að eiga við þau.

Yfirlit yfir verklag með raðreitatækni.

Það eru þessi milliliðalausu samskipti sem vekja áhuga flestra, og þá ekki bara í tengslum við viðskipti. Margir eru farnir að sjá töluvert fleiri möguleika fyrir raðreitatæknina og er hún þess vegna talin jafnbyltingarkennd og Kristinn Steinar og aðrir vilja meina. Raðreitatækni getur nýst í hvers kyns samskiptum þar sem þörf er á traustum og áreiðanlegum aðgerðum milli aðila. Þar á meðal eru starfsemi bókasafna, samningsgerð og nám.

Jason Griffey verið að skoða hvernig raðreitatæknin getur nýst bókasöfnum. Bókasöfn þurfa að geta haldið utan um útlán og vitað hver er með hvaða bækur hverju sinni. Til þessa hafa bókasöfn notað til þess lokaða gagnagrunna sem halda utan um gögn um bókaeign og útlánastarfsemi. Ókosturinn við þetta er að gögnin eru yfirleitt geymd miðlægt á hverju safni fyrir sig. Bókasafnsgestir, önnur bókasöfn og bókaútgefendur hafa því takmarkaðan aðgang að gögnum sem gætu nýst þeim eða eru þeim viðkomandi. Miðlæg gagnageymsla hefur líka í för með sér að ef eitthvað fer úrskeiðis á miðlæga gagnageymslusvæðinu getur það haft alvarlegar afleiðingar, t.d. ef gögn eyðast eða þeim breytt á óvart eða af óprúttnum aðila. Raðreitatæknin kemur í veg fyrir þetta með því að vista gögn í skýinu til að auðvelda aðgengi og með notkun öflugrar dulkóðunar sem tryggir gagnaöryggi.

Hvernig ferilskrár gætu mögulega litið út með raðreitatækni.

En hvernig gæti raðreitatækni nýst í tengslum við nám og skólastarf? Sumir, eins og Sony, eru byrjaðir að velta því fyrir sér. Skýrasta dæmið um mögulega gagnsemi raðreitatækni í tengslum við nám er skráning og vistun námsferilsskráa. Eins og hugsað er um námsferil í dag eru mestar líkur á að námsferilsskrá innihaldi gögn frá fjölda aðila, t.d. skóla, námskeiðshaldara, vinnuveitenda og fleiri. Oft er heildar námsferilsskrá með upplýsingum frá öllum þessum aðilum samansett af misáreiðanlegum gögnum sem er safnað af viðkomandi einstaklingi sjálfum og afhend þeim sem þurfa. Þá er fátt sem kemur í veg fyrir að gögn séu skráð rangt eða jafnvel að viðkomandi skáldi gögn. Þá þarf sá sem tekur á móti námsferilsskránni að leggja mikið á sig til að staðfesta áreiðanleika gagnanna: að hafa samband við skóla eða námskeiðshaldara og þess háttar. Með raðreitatækni væri námsferill viðkomandi skráður með öruggri samskiptaaðgerð (transaction) milli námsmanns og fræðsluaðila í hvert sinn sem námi er lokið:

1. nemandi lætur fræðsluaðila hafa einkennislykil,
2. fræðsluaðili notar eigin einkennislykil til að stofna til aðgerðar,
3. námsgögn eru skráð á nafni nemanda með rekjanlegum upplýsingum um aðila sem komu að aðgerðinni, þar með talið fræðsluaðila,
4. raðreitatæknin sér til þess að gögn eru varðveitt í skýinu,
5. nemandi gefur vinnuveitanda lykil sem veitir aðgang að námsgögnum hans,
6. vinnuveitandi sér öll gögn, hverjir voru aðilar að hverri aðgerð, hvenær gögnin voru skráð og breytingarsögu ef einhver er, og annað sem fylgir skráningunni.

Þannig er tryggt að þau gögn sem birtast í námsferilsskránni eru rétt skráð og koma frá viðeigandi aðila – og hægt er að sjá nákvæmlega hver sá aðili er.

Það má vel hugsað sér fjölda annarra notkunarmöguleika raðreitatækni í námi og skólastarfi, t.d. við skil á verkefnum á rafrænu formi og fleira. Hvað sem hverjum dettur í hug er mikill áhugi á möguleikum þessarar tækni sterk vísbending um að hún muni hafa töluverð áhrif á ýmiss svið mannlegra samskipta á komandi árum og auka til muna áreiðanleika og gagnsæi í slíkum samskiptum.

Á þessu ári kom út bókin Math on the move þar sem unnið er með algebru í gegnum hreyfingu. Efni bókarinnar verður grunnur í námskeiði sem haldið verður á Menntavísindasviði HÍ.

Sjá nánar í meðfylgjandi auglýsingu.

Vakin er athygli ykkar á námskeiði um stærðfræði og listir sem haldið er í samstarfi
Rannsóknarstofu um stærðfræðimenntun, Flatar, samtaka stærðfræðikennara og RannUng.
Sjá nánari upplýsingar í meðfylgjandi auglýsingu og hægt er að skrá sig með því að smella hér.

Pangea er einstaklingskeppni í stærðfræði fyrir nemendur í 8. og 9. bekk. Hún er nú haldin á Íslandi í þriðja skipti. Keppnin skiptist í þrennt en fyrstu tvær umferðirnar fara fram í grunnskólunum sjálfum. Við sendum krossapróf sem kennarar leggja fyrir nemendur sína. Mismörg stig eru gefin fyrir hverja spurningu og ekki dregið niður fyrir röng svör. Spurningarnar eru miskrefjandi og er markmiðið að allir geti glímt við dæmi við sitt hæfi.

U.þ.b. helmingur þátttakenda kemst áfram í 2. umferð sem fer fram á sama hátt og sú fyrsta. Loks komast þeir efstu úr hvorum árgangi áfram í úrslitin sem fara fram í Menntaskólanum í Hamrahlíð. Þar mæta nemendur ásamt aðstandendum og úrslitin ráðast. Boðið verður upp á veitingar og skemmtiatriði á meðan yfirferð úrlausna stendur og beðið er eftir verðlaunaafhendingunni. Vegleg verðlaun eru í boði fyrir efstu sætin en auk þess fá allir sem komast í úrslit viðurkenningarskjal.

Við stefnum á að halda keppnirnar á eftirfarandi dögum:

1. umferð: 31. janúar
2. umferð: 21. febrúar
Úrslit:        17. mars

Ef þessir dagar eru frídagar í einhverjum skólum munum við finna lausn á því.

Við munum opna fyrir skráningar í janúar og auglýsum skráningu síðar.

Endilega fylgist þið með á facebook síðu okkar og heimasíðu:

https://www.facebook.com/PangeaStaerdfraedikeppni/

https://www.pangeakeppni.is

Ef þið hafið spurningar má hafa samband í gegnum tölvupóst (info@pangeakeppni.is), á Facebook síðu okkar og í síma 781 8143 (Muhammed) eða 898 8455 (Freyja).

Rannsóknarstofa um stærðfræðimenntun og Flötur, samtök stærðfræðikennara, standa fyrir meðfylgjandi dagskrá.

Vonumst til að sjá ykkur sem flest!

Dagskrá VOR 2018 til útprentunar

Follow @Menntamidja

Á mánudaginn 5. febrúar ætlar Menntamiðja að hleypa af stað nýju verkefni sem er ætlað að vekja athygli á áhugaverðu og framsæknu skólastarfi í íslenskum skólum og stuðla að því að kennarar deili og nýti þá miklu reynslu og þekkingu sem býr í íslensku skólasamfélagi.

Verkefnið fer fram á samfélagsmiðlinum Twitter undir notandanafninu @Menntamidja og er þannig að í hverri viku fær einn skóli aðgang að aðgangi @Menntamidju og notar hann til að tísta myndum og frásögnum af áhugaverðu og framsæknu skólastarfi á sínum heimaslóðum. Fyrstur skóla verður Hólabrekkuskóli en þar hefur margt áhugavert verið í vinnslu með uppbyggingu Snillismiðju og þróun kennsluhátta í tengslum við það.

Áhugasamir geta fylgst með með því að fylgja notandanum @Menntamidja á Twitter. Einnig er hægt að fylgjast með tístum á vef Menntamiðju: http://menntamidja.is/menntamidja-skyggnst-inn-i-skolastarf/

Þeir sem hafa áhuga á að tísta frá sínum skólum í framtíðinni geta haft samband við verkefnisstjóra Menntamiðju, Tryggva Thayer (tbt@hi.is).

Á Menntavísindasviði Háskóla Íslands verður á næstu misserum boðið upp á nýtt og spennandi nám fyrir starfandi grunnskólakennara. Um er að ræða diplómanám (15-30e) sem dreifist á 3 misseri og nýtist til meistaragráðu fyrir þá sem vilja. Áhersla er á samvinnu kennara í náminu og kennara  á sviðinu að því að efla nám nemenda í náttúrugreinum.

Við skipulag námsins var unnið út frá upplýsingum sem komu fram í svörum við spurningalista sem sendur var í fyrra til kennara sem kenna náttúrugreinar. Námið er útskýrt nánar í meðfylgjandi kynningarblaði.
Með bestu kveðjum og von um að sjá þig í haust
Kristín Norðdahl umsjónarmaður námsins

Framvegis símenntunarmiðstöð stendur fyrir námskeiði í Communicator 5  tjáskiptaforritinu. Þetta gagnast öllum þeim sem vinna með tjáskiptaforritið. 

Bestu þakkir til  þátttakenda á námskeiðinu  um starf sérkennslustjóra á leikskólum í Endurmenntun Háskóla Íslands þann 9. febrúar síðastliðinn.

Hér er hægt að nálgast rafræn gögn af námskeiðinu:

Glærur Fjólu Þorvalds  starf sérkennslustjóra 

Glærur Hönnu Rúnar um Sérkennslutorg og tengt efni

Eyðublöð sem gott er að nota til hagræðingar í starfinu.

Kennsluhefti um Outlook póstkerfið 

Menntakvika er árleg ráðstefna Menntavísindasviðs HÍ um rannsóknir, nýbreytni og þróun í menntavísindum. Hún verður haldin föstudaginn 6. október á Menntavísindasviði HÍ v/Stakkahlíð.

Á ráðstefnunni verða tvær málstofur um stærðfræði.

Aðgangur er öllum opinn og kostar ekkert. Ekki þarf að skrá sig á ráðstefnuna.

Ágrip

Náttúrufræðikennrarnir Margrét Hugadóttir og Dögg Lára Sigurgeirsdóttir taka á móti okkur í Langholtsskóla og kynna námsefnið Vísindavöku. Námsefnið samanstendur af kennslumyndböndum, kennsluleiðbeiningar og tillögur að námsmati.

Markmið Vísindavöku eru að nemendur verði færir til að tjá sig um vísindalegt ferli og geti beitt orðinu „breyta“. Verkefnið er ætlað nemendum í 6.-10. bekk og getur verið endurtekið árlega. Í erindinu velta þær upp spurningum um hvað sé góð verkleg æfing? Hvernig hægt sé að auka vægi nemendanna sjálfra í verklegum æfingum? og hvernig hægt sé að kenna um breytu á árangursríkan hátt? Hvernig má meta verklega kennslu með tilliti til hæfniviðmiða? Í kjölfar erindisins fer fram „ör“ vísindavaka þar sem þátttakendur fá tækifæri til að setja sig í spor nemenda og hanna eigin tilraun sem tengist daglegu lífi eða prófa að setja þekkta tilraun í nýjan búning með könnun nýrrar breytu.

Umræður verða í framhaldinu og ríkuleg tækifæri gefast til spurninga.

Athugið að skráning er bindandi. Öllum velkomið að droppa inn!

Skráning hér.

Hverjir: Grunnskólakennarar og aðrir áhugasamir.
Hvar: Í náttúrufræðistofunni, C-05, í Langholtsskóla, Holtavegi 23, 104 Reykjavík.
Hvenær: Fimmtudaginn 22. mars kl. 15:00-17:00.
Verð: Menntabúðir eru þátttakendum að kostnaðarlausu.

Umsjón: Ester Ýr Jónsdóttir, verkefnisstjóri NaNO – esteryj@hi.is

Verkefnisstjórar NaNO vekja athygli á námskeiði um FUGLA fyrir starfandi kennara og kennaranema, mánudaginn 23. apríl 2018 kl. 14:30-16:00

Menntabúðir NaNO verða í þetta sinn á formi námskeiðs um fugla.

Grandaskóli hefur verið þátttakandi í Erasmus+ verkefni sl. tvö ár ásamt skólum frá fimm öðrum Evrópulöndum. Verkefnið fékk nafnið Fuglar og markmiðið var að þróa þverfaglegt námsefni í náttúrufræði fyrir nemendur á miðstigi grunnskólans. Helstu viðfangsefni verkefnisins eru fuglaskoðun og rannsóknir á fuglum í sínu náttúrulega umhverfi. Kennslufræðilegur grunnur verkefnisins byggir á rannsóknarvinnu með nemendum í mismunandi náttúrulegu og menningarlegu umhverfi og fjölbreyttri úrvinnslu gagna.

Á þessu stutta námskeiði munu Arngunnur H. Sigurþórsdóttir og Arnheiður Ingimundardóttir kennarar í Grandaskóla segja frá verkefninu og kynna nýtt námsefni sem þær hafa þróað og tilraunakennt ásmat samstarfsskólum verkefnisins í Ungverjalandi, Transilvaníu, Póllandi, Spáni og Þýskalandi.

Kaffiveitingar í boði og að loknu námskeiði fá þátttakendur tilbúið námsefni um fugla, ætlað fyrir kennslu á miðstigi.

Umræður verða í framhaldinu og ríkuleg tækifæri gefast til spurninga.

Athugið að skráning er bindandi. Öllum velkomið að droppa inn!

Skráning hér.

Hverjir: Grunnskólakennarar, kennaranemar og aðrir áhugasamir.
Hvar: Í Grandaskóla, Keilugranda 12, 107 Reykjavík.
Hvenær: Mánudaginn 23. apríl kl. 14:30-16:00.
Verð: Námskeiðið er þátttakendum að kostnaðarlausu.

Umsjón: Ester Ýr Jónsdóttir, verkefnisstjóri NaNO – esteryj (hjá) hi.is

Vakin er athygli á námskeiði sem kallast Jarðvegur, landlæsi, vistheimt og sjálfbærni í skólastarfi.

Nánar má lesa um námskeiðið hér

Mynd: Max Pixel

Næsta skólaár verða í boði tvö námskeið sem eru hluti af viðbótardiplómu í Náttúrufræðimenntun fyrir starfandi grunnskólakennara sem stefnt er að því að bjóða upp á í framhaldinu. Þetta eru námskeiðin Útikennsla og staðtengt nám og Verkleg viðfangsefni í eðlis- og efnafræði.

Umsóknarferli: Sótt er um námið rafrænt á vef Háskóla Íslands, www.hi.is. Smellið á Sækja um nám efst til hægri á síðunni og sláið inn umbeðnar upplýsingar á næstu síðum. Veljið síðan leiðina Menntunarfræði leik- og grunnskóla, viðbótardiplóma og kjörsviðið: kennslufræði og skólastarf. Þá eru námskeiðin Útikennsla og staðtengt nám og Verkleg viðfangsefni í eðlis- og efnafræði valin.

Umsóknarfrestur er til 5. júní 2018.

Sjá nánari lýsingu á náminu í Skólavörðunni (bls. 52-53).

Nánari upplýsingar veitir Kristín Norðdahl – knord (hjá) hi.is

Á Menntavísindasviði Háskóla Íslands er einnig boðið upp á stök einingabær námskeið á haustmisseri 2018.

Námskeiðin eru ætluð þeim sem hafa lokið hafa bakkalárgráðu á þeim fræðasviðum sem Menntavísindasvið menntar.

Ekki þarf að vera innritaður í nám við Háskóla Íslands til að geta skráð sig í þessi námskeið en þau eru samt sem áður metin til eininga sé þeim lokið með tilskildum árangri.

Umsóknarfrestur er til 15. júní 2018.

Skráningargjald er 55.000 kr. Greiðsla staðfestir umsóknina og þarf að berast í síðasta lagi 15. júlí 2018.

Hér eru nokkur þeirra námskeiða sem eru í boði  (hér má nálgast allan listann):

• SNU004M Rannsóknir og þróun í náttúrufræðimenntun 5e
• SNU003F Útikennsla og staðtengt nám 5e
• TÓS001M Staðtengd útimenntun 10e SUMAR (kennt í ágúst)
• UME102F Fræðslustarf, nýsköpun og atvinnulíf 10e
• LVG102M Tónlist og heilinn 10e
• KME203F Þróun stærðfræðihugmynda ungra barna 10e
• SSF104F Undirbúningur fyrir stærðfræðigreiningu 5e
• SSF101F Kynning og upplýsingatækni 5e
• SNU501M Algebra og strjál stærðfræði 10e

Skráning fer fram hér

Stundatöflur deilda á Menntavísindasviði eru hér

Nánari upplýsingar veitir Ásdís Hrefna Haraldsdóttir – asdish (hjá) hi.is

Í Victoria & Albert lista- og hönnunarsafninu í London opnaði nýlega sýning undir yfirskriftinni, Framtíðin hefst hér (The Future Starts Here). Á sýningunni eru ýmsir munir og verkefni kynnt sem eiga að gefa vísbendingar um hvers er að vænta í framtíðinni. Það eru m.a. annars listaverk sem eru í raun skáldverk um mögulega framtíð sem eru ætluð að örva ímyndunaraflið. En einnig eru þar til sýnis hugmyndir og frummyndir verkfræðinga og iðnhönnuða sem eru ætluð að hjálpa okkur að takast á við tilteknar áskoranir og bæta líf sem flestra.

Vélmennið BRETT tekur á móti gestum á sýningunni Framtíðin hefst hér og sýnir hvernig nútíma vélmenni geta lært að gera einfalda hluti fyrir okkur.

Markmið sýningarinnar er að leiða gesti áfram inn í mögulegar framtíðir með því að sýna hvað er raunverulega hægt um leið og ímyndunaraflið er virkjað til að víkka út möguleikana. Menntun er með fyrirferðamestu verkefnum sem nútímasamfélög taka sér fyrir hendur og hér því mjög áhugavert innlegg í umræðu um framtíð menntunar þó svo að sýningin snúist ekki beint um það efni.

Listakonan Jalila Essaidi ímyndar sér að hægt verði að virkja tré til að nota sem loftnet fyrir þráðlaust net.

Það er oft sagt að enginn viti hvað framtíðin beri í skauti sér. En í raun má segja að við vitum oft töluvert meira um framtíðina en margir halda. Vísbendingar um hvers er að vænta í framtíðinni eru allt í kringum okkur því það eru ákvarðanir okkar og athafnir í dag sem móta framtíðina. Vísbendingarnar eru af ýmsu tagi og birtast á mörgum stöðum:

• Vísindafólk og verkfræðingar leita stöðugt skýringa og lausna á margvíslegum áskorunum.
• Listafólk skapar nýja sýn á umhverfi okkar og veruleikann sem við búum í.
• Stjórnvöld og stjórnendur stýra samfélögum okkar inn á brautir sem ætlaðar eru að tryggja okkur farsæld.
• Almenningur gerir sér væntingar um hvers konar líf það vill fyrir sig og afkomendur sína.

… svo fátt eitt sé nefnt.

Oft koma upp deilur því ekki sjá allir fyrir sér sömu framtíð. Hvað verður úr er ávallt útkoma flókinna, og oft óljósra, samningsferla þar sem togast á ólíkar hugmyndir um hvað er þarft, æskilegt eða réttlátt. Það gerir það að verkum að fyrir okkur flest einkennist framtíðin fyrst og fremst af óvissu.

Bento Labs er að þróa einfaldan og ódýran búnað til að greina erfðaefni hvar sem er, hvenær sem er og á einfaldan hátt. Það má vel hugsa sér að grunnskólanemendur munu ekki aðeins kryfja smádýr í líffræðitíma heldur líka gera erfðagreiningar.

Þrátt fyrir alla þessa óvissu má vel greina strauma og mótunaröfl ef vitað er að hverju þarf að leita. Sýningin Framtíðin hefst hér er einmitt ætluð að draga úr óvissunni sem fylgir framtíðinni með því að sýna hvaða möguleikar eru fyrir hendi og hvert þeir geta leitt okkur. Endanlegt markmið hlýtur að vera að virkja almenning í samræðu um framtíð sína og okkar allra svo hann verði meðvitaðri um eigið hlutverk í mótun framtíðarinnar.

Þau öfl sem munu móta samfélög okkar eru þau sömu og móta framtíð menntunar og er því sýning sem þessi, og nánast allt sem varpar ljósi á möguleika framtíðarinnar, góður efniviður í samræður sem þurfa að fara fram á vettvangi menntunar.

Rannsóknarstofa um stærðfræðimenntun og Flötur, samtök stærðfræðikennara, standa fyrir meðfylgjandi dagskrá.

Vonumst til að sjá ykkur sem flest!

Dagskrá HAUST 2018 til útprentunar